AA.VV.VILAXOAN

NOTA DE DIMISIÓN COMO PRESIDENTE

17-11-2006 

Vilaxoán de Arousa.

Teodomiro Cardalda Fernández como Presidente da Asociación de Veciños de Vilaxoán.

Expón ante a Xunta Directiva a súa dimisión o primeiro de decembro de 2006, por problemas persoais e de índole laboral. Con esta decisión vaise facer unha remodelación de cargos na Directiva onde o Presidente Accidental que sexa nomeado terá un ano a partir da miña dimisión para facer unha Xunta Xeral onde se elixirá unha nova directiva por cinco anos en base aos Estatutos actuais.

A Directiva actual que me acompañou neste anos, con un traballo excepcional xa que sen eles nada se podería facer, teñen que estar moi orgullosos dos logros acadados en todos estes anos, contando coas dificultades e atrancos que tivemos por parte dos poderes públicos e da indiferencia . Os logros están hai, enumeralos sería encher moitas follas, xa que unhas veces o traballo de petar nas portas e nos despachos oficiais non se nota ante a opinión pública, pero de tanto petar algo se acadou, non todo o que queriamos. Unha das nosas e importantes reivindicacións por ser unha das infraestructuras que lle podía dar un despegue a Vilaxoán e sacar a vila da decadencia, foi a rexeneración da Praia do Preguntoiro que tantos quebradeiros de cabeza nos trouxo desde fai preto de 10 anos, cousa que se está a rematar e agardo con ansia que os compañeiros que quedan logren finalizala o vindeiro ano, iso sería un logro e orgullo para todos aqueles que loitaron desde o principio do ano 1996. sendo presidente Manuel A. Piñeiro e logo Ramiro González Mariño, sen esquecer a todos aqueles que pasaron pola directivas en todo ese tempo. Gustaríame chegar a esa finalización co traballo rematado, pero por eses motivos anteriormente expostos non pode ser. Os que quedan teñen a suficiente valentía e orgullo para petar nos despachos oficiais e rematar a praia antes do verán do 2007.

Entre moitas cousas pequenas que se acadaron, enumero as máis importantes: a remodelación da rúa Pardiñas, a remodelación da Praza de Rafael Pazos, A Alternativa ao Plan Xeral de Urbanismo aprobada nun Pleno co 80% das nosas peticións co respaldo de preto 2000 sinaturas etc..Pero do que máis me sinto orgulloso, e por que non dicilo tamén, un pouco vaidoso, de acadar que un Pleno no Concello por unanimidade de tódolos grupos políticos,  por petición desta Asociación, aprobara a Rúa a Ramón Patiño, fundador deste Colectivo no ano 1976.

Agora para os que quedan lles agarda unha tarefa  moi importante que está en marcha, como son: a remodelación de todo o Casco Histórico coa axuda da Consellería da Vivenda e Solo, cousa que xa se falou nunha entrevista en Santiago cos responsables desa Consellería. A remodelación da Rúa Alfredo Saralegui, Rúa Bouza de Abaixo e Vázquez Leis para nun futuro non moi lonxano recuperar unha vila en base a súa historia con atractivo turístico e calidade de vida. A curto e longo prazo rexenerar todo o litoral  ata o Esteiro con un paseo marítimo sen impacto ambiental. Paseo que vimos reclamando desde fai dez anos.

A todos da Directiva lles pido que non tiren a toalla por moitos atrancos que teñan, o tempo e o bo facer ao final chega a compensación para o pobo. Sabedes que non é un camiño de rosas, sempre teredes detractores pero eses son sempre minoría, o principal é tirar para diante e demostrar con feitos e non con palabras aos que intentan destruír.

Un saúdo e apertas a todos vos pola axuda en todo esta andaina da Asociación  e podedes contar comigo como socio e como compañeiro para todo o que sexa.

Teo Cardalda

Vilaxoán, 16 de novembro de 2006

-------------------------------------------------------------------------------------------

Teo Cardalda ex-presidente da AA. VV. “Vilaxoán”

17-11-200

Lembranzas-Video AA.VV.Vilaxoán

Foto-Ramón Patiño del Valle. Fundador da Asociación en 1976.

Como actual Presidente da Asociación, teño o pracer e a ledicia de estrear este Blog cunha pequena mención ao que foi o fundador desta Asociación, xa que xusto e meritorio é que sempre quede na historia un home que tanto fixo polo pobo e as veces pouco comprendido. Coido que ao final se lle recoñeceu o seu mérito sendo homenaxeado adicándolle unha rúa no seu pobo natal. Recoñecemento por toda a Corporación unanimemente nun Pleno o 11 de abril de 2000.Xamais pensaría Ramón que algún día estivera polas autoestradas da información, por esta rede de redes, el sempre me dicía que iso de Internet era cousa de Diaños, pero si valía para que a xuventude tivera información para ter as ideas moi clariñas, pois ben vido sexa. Hoxe eu o das ideas clariñas o dubido moito e coido que Moncho na actualidade estaría dacordo conmigo. Ata sempre Ramón.

Teo Cardalda Fernández

Vilaxoán, 14-11-2006

___________________________________________

Ramón Patiño del Valle, veciño de Vilaxoán,coñecido popularmente por “Moncho”, naceu nesta vila o 10 de abril de 1932 e finou o día 7 de maio de 1999 en Tenerife, sendo soterrado no camposanto de Sobrán o día 9 do mesmo mes. Moncho foi un gran loitador por acada-la democracia neste país en especial naquela “longa noite de pedra” sufrindo as consecuencias que naquelas datas dos anos setenta non eran moi doadas para quen pedira un pouco de liberdade.

Ao pouco de rematar a dictadura xa tiña na súa cabeza o organizar ao pobo, así foi cando o 26 de maio de 1976 funda en Vilaxoán esta Asociación de Veciños, sendo unha das primeiras que comezaron a actuar legalmente en España, tendo un ha chea de atrancos naquelas datas por parte dos organismos oficiais, xamais tirou a toalla, estando sempre ao pé do canón defendendo a calquera veciño.

Non esquecemos dun home deste pobo que, co seu sacrificio persoal sempre deu a cara e estivo loitando para que Vilaxoán tivera o que por xustiza e necesidade tiña que ter. Pensamos que a maioría da xente da vila sabe moi ben o que lle custou loitar por este pobo. Todo o que fixo sempre foi unha laboura altruísta e sen recibir nada a cambio, e parece que dicir isto nestes tempos de individualismo, corrupción, egoísmo e globalización da unha sensación de que foi un conto, que non foi real.

Naqueles comezos da Asociación, tratou de xuntar unha morea de persoas para iniciar os primeiros pasos para construír unha Asociación sólida e con respaldo dabondo, xa que o tempo onde acontecián as cousas non eran doadas, estabamos nunha época de transición política, comezaba unha nova coa pre-democracia, Ramón estaba a ollar un período de esperanza e ilusión que rematou felizmente coa liberdade política. Esta morea de persoas que formaban a Xunta Xestora da Directiva (gostaríame citalas a todas, pero por medo a esquecerme dalgunhas delas non o fago e pídelle a todas esta persoas disculpas por non citalas) algo ou moito teñen que dicir de Moncho.

Ramón deulle un pulo valente a Asociación, acadando cousas moi importantes para o pobo e tamén entón para Sobradelo. Citaremos alguhas que lembramos: as famosas pancartas pedindo os semáforos na estrada que vai de Vilagarcia a Cambados, as recomendacións aos conductores de circular amodiño, as xestións que fixo para acadar os sumideiros das rúas e coa axuda dos veciños/as a Rosaleda , cousa que todos lembramos. Cantidade de xestións que fixo Ramón e non todas con resultados positivos xa que atopaba moitos atrancos por parte das Autoridades e Políticos de turno. Unha das grandes xestións, foi escribir ao Ministerio de Cultura (naquel entón Pío Cabanillas) para que se lle concedera unha Casa da Cultura para Vilaxoán, o Ministro lle constestou que falara co Alcalde ( Sr. Nogueira) que asiña se lle concedería, así foi.

Xusto é recoñecer que adicou grande parte da súa vida a loitar por esta vila con maior ou menor fortuna, pero moitas veces coidamos que non foi comprendido, pero xamais se escondeu e deu a cara sempre sen avergoñarse de nada, e iso é de moito agradecer.

Pertenceu e foi fundador con outros da Asamblea Democrática de Arousa, colaborou na fundación da Federación Española de Asociacións Veciñais, era membro do Comité Central do P.C.G.

Ramón nas primeiras eleccións municipais democráticas foi concelleiro facendo unha labor moi importante cara o seu pobo, por riba dos seus ideais políticos, inclusive enfrontándose aos seus compañeiros de partido cando as cousas non ían ben para Vilaxoán.

Vilaxoán de Arousa, 15-11-2006

---

Cando se inaugurou a Paseo co nome de Ramón Patiño

Por iniciativa da Asociación de Veciños de Vilaxoán, o Concello dedicoulle unha rúa que leva o seu nome que foi aprobado no pleno por unanimidade de tódolos grupos políticos do Concello o 31 de marzo do 2000.A mañá do día 22 de xullo do 2000, se lle fixo unha homenaxe na rúa que leva o seu nome, descubríndose unha placa. Xunto a placa unha pedra con un poema gravado do escritor e poeta Gonzalo Bouza-Brey, dedicado a memoria de que fora seu compañeiro de partido e corporación.

Neste acto estiveron veciños da vila, o Alcalde Javier Gago, o crego da freguesía D. Lino, toda a Corporación, representantes de tódolos grupos políticos de Vilagarcia, Bisbarra e Galicia.

Na placa reza a lenda seguinte:

“PASEO, RAMÓN PATIÑO DEL VALLE.

O POBO DE VILAXOÁN AO SEU CONCELLAL E FUNDADOR DA NOSA ASOCIACIÓN DE VECIÑOS, XULLO 2000.

O poema gravado na pedra e escrito por G.Bouza-Brey, comeza deste xeito:

“NOSA NAO XA NON TEN RUMO,/

DEIXÓUNOS O SEU CAPITÁN,/

AFONDÓUNOS NO ESCURO VACÍO; NAS SOIDÁS......./

MAR E VENTO FICAN MUDOS /

NAS PRAIAS DE VILAXOÁN...................”

FOTOS DO ACTO

Poema completo adicado a "Moncho"

---

N  I  F 

 00

 0

01

02

 03

04

05

06

07

08

09

10

11

 12

13

Vilaxoán de Arousa,15-11-2006

Hemeroteca Xornais

1996

1998

1999